Alberto Nessi


Gron premi svizzer da litteratura 2016

Alberto Nessi

Alberto Nessi è sco la figura da l’autur en in raquint dad Antonio Tabucchi in collecziunader passiunà d’eveniments vardaivels ch’el metta persuenter sin palpiri. Quai fa el medemamain en ses ultim cudesch, Miló (2014), nua ch’el transfurma istorgias da vita individualas en ovras litteraras considerablas e demussa da nov sia sensibilitad extraordinaria da sa metter en la situaziun dals auters e sia abilitad da tadlar als umans.

Las lingias che Nessi scriva èn pelvaira ina registraziun da fragments en las vitas da persunas solitas. Persunas sursiglidas da l’istorgia ed emblidadas da la memoria collectiva. Ils titels expressivs da sias emprimas ovras n’èn perquai betg casuals: I giorni feriali, Ai margini e Rasoterra. Els stattan per in champ tematic che l’autur ha definì gia baud ed al qual el è restà fidel. Tuttina ha el sviluppà vinavant e creà da novamain ils cuntegns e las furmas da sias ovras. Questa fidelitad a sasez en cumbinaziun cun il schlargiament da l’orizont pon ins constatar bain en la rimnada lirica Ladro di minuzie (2010) ubain en ses roman La prossima settimana, forse (2008). Quest ultim ha ina structura cumplexa e plurifurma, nua che nus accumpagnain la figura José Fontana sin ses viadi d’ina val laterala tessinaisa en la realitad urbana d’ina gronda citad europeica, intellectualmain e politicamain vitala, a Lissabon en la segunda mitad dal 19avel tschientaner.

Gia ditg avant ch’el ha accumplì ses 75avel anniversari na devi in singul dubi, che Alberto Nessi vegniss ad avair ina plazza extraordinaria en la litteratura italofona da la Svizra e ch’el tutga tar ils auturs ils pli renumnads e translatads il pli savens en las autras regiuns da noss pajais. Malgrà quai èsi ina coincidenza ch’el è vegnì undrà gist ussa cun il Grond premi svizzer da litteratura, ussa ch’el po er festegiar quest spezial giubileum biografic.