Giuria

Giuria federala da litteratura, 2015.

Giuria

Editorial dal president

 

Dapi l’onn 2012 attribuescha la Confederaziun er premis e distincziuns en il champ da la litteratura. Dentant, datti insumma quest singular, la litteratura? Poesias, romans criminals, essais, gieus auditivs, autobiografias, raquints etc. etc. stattan qua in sper l’auter, e lura tut anc en quatter linguas? La giuria, expertas ed experts cun diversas affinitads e linguas, prova da survegnir ina survista generala, prova da valitar e congualar ovras ch’èn difficilmain cumparegliablas. Las ovras che vegnan distinguidas na duain però betg mo esser excellentas entaifer lur context linguistic. Ellas ston er meritar da vegnir scuvridas ordaifer l’univers en il qual ellas èn vegnidas creadas. Mintgatant èsi pelvaira pli difficil da surpassar ils cunfins linguistics a l’intern da la Svizra ch’ils cunfins naziunals tranter regiuns da la medema lingua.

Da tscherner mo in’unica ovra victura tranter las 250 ovras litteraras inoltradas per la Concurrenza federala da litteratura fiss propi tradir l’impurtanza da la diversitad. Suenter discussiuns intensivas en trais linguas ha la giuria perquai proponì ina glista dad set ovras che represchentan ensemen il panorama d’ina actualitad litterara zunt viventa, multifara e curaschusa.